ადამიანის უფლებათა ევროპულმა სასამართლომ საქმეზე „მილაძე საქართველოს წინააღმდეგ“ გადაწყვეტილება გამოაქვეყნა, რომლითაც სრულად გაიზიარა იუსტიციის სამინისტროს პოზიცია და ძალაში დატოვა ეროვნული სასამართლოების მიერ გამოტანილი განაჩენი. სტრასბურგის სასამართლომ ერთხმად დაადასტურა, რომ თანამდებობის პირთა მიმართ საჯაროდ გაკეთებული შეურაცხმყოფელი, დამამცირებელი და უცენზურო განცხადებები გამოხატვის თავისუფლებით დაცულ ფარგლებს სცდება.
სამაზნე სამართლებრივი დავა 2022 წელს სოციალურ პლატფორმა „TikTok“-ზე გავრცელებულ ვიდეოს უკავშირდება. საქმის მასალების თანახმად, მომჩივანმა, სამოქალაქო აქტივისტმა ირაკლი მილაძემ, თბილისის მერის, მერიის თანამშრომლებისა და პოლიციის მისამართით უხამსი და შეურაცხმყოფელი გამონათქვამები გამოიყენა. აღნიშნული სამართალდარღვევისთვის ეროვნულმა სასამართლოებმა მას კანონით გათვალისწინებული მინიმალური სანქცია – 500 ლარის ოდენობის ჯარიმა დააკისრეს.
ევროპულმა სასამართლომ სამართლებრივი შეფასებისას ხაზგასმით აღნიშნა, რომ მომჩივნის განცხადებები არ წარმოადგენდა პოლიტიკურ კრიტიკას ან საზოგადოებრივი ინტერესის საკითხზე აზრის გამოხატვას. საერთაშორისო სასამართლო ინსტანციის დასკვნით, ვიდეოში გამოყენებული ენა მიზნად ისახავდა ექსკლუზიურად საჯარო მოხელეების დამცირებასა და შეურაცხყოფას.
სტრასბურგის სასამართლომ სრულად გაიზიარა ეროვნული სასამართლოების დასაბუთება და მიიჩნია, რომ შიდასახელმწიფოებრივმა სასამართლოებმა სწორად მართეს ბალანსი ლეგიტიმურ კრიტიკასა და პირად შეურაცხყოფას შორის. გადაწყვეტილებაში განსაკუთრებული ყურადღება დაეთმო პროპორციულობის პრინციპს — აღინიშნა, რომ მსჯავრდებულის მიმართ გამოყენებული ფულადი სანქცია იყო მინიმალური და პროპორციული.
აღნიშნული გადაწყვეტილებით ევროპულმა სასამართლომ კიდევ ერთხელ განამტკიცა ფუნდამენტური პრინციპი, რომლის მიხედვითაც, გამოხატვის თავისუფლება, როგორც დემოკრატიული საზოგადოების საფუძველი, იცავს მწვავე კრიტიკას, თუმცა ის არ მოიცავს სხვათა ღირსების შემლახველ ქმედებებს.
ამასთანავე, სტრასბურგის სასამართლოს პრეცედენტით მკაფიოდ განისაზღვრა, რომ სახელმწიფო უფლებამოსილია დაიცვას პოლიტიკური თანამდებობის პირები და საჯარო მოხელეები დაუსაბუთებელი სიტყვიერი თავდასხმებისგან, რათა უზრუნველყოფილ იქნას მათ მიერ სამსახურებრივი მოვალეობების შესრულება ზეწოლისგან თავისუფალ გარემოში. სასამართლოს შეფასება ცხადად ადგენს, რომ უფლების განხორციელება, განსაკუთრებით ინტერნეტსივრცესა და სოციალურ ქსელებში, არ უნდა გადაიზარდოს სხვათა უფლებებისა და პატივის შემლახველ შეურაცხყოფაში.