ზაირა ჯებისაშვილის მიერ დაზარალებულ ადამიანთა წრე გორში შეიძლება კატასტროფულად გაიზარდოს. ამის შესახებ ნაზო კურტანიძის ადვოკატი, ლევან ჭიღლაძე საუბრობს. მისი თქმით, გენერალურ პროკურატურაში წარდგენილი განცხადების საფუძველზე, გორის პოლიციამ ე.წ. მევახშის წინააღმდეგ მოკვლევა უკვე დაიწყო. ადვოკატის განმარტებით, გამოიკვეთა სქემა, რომლის მიხედვითაც, ჯებისაშვილი მოქალაქეების მძიმე ეკონომიკური მდგომარეობით სარგებლობდა და სესხის გაცემის ნაცვლად, ქონებას პირდაპირ ნასყიდობის ხელშეკრულებით იფორმებდა, პარალელურად კი მათგან პროცენტებს იღებდა.
„მოვუწოდებ გენერალურ პროკურატურას და ფინანსთა სამინისტროს საგამოძიებო ორგანოს, დაინტერესდეს ზაირა ჯებისაშვილის საქმიანობით და დაიწყოს მის წინააღმდეგ ობიექტური გამოძიება,“ — აცხადებს ლევან ჭიღლაძე.
შეგახსენებთ, რომ აღნიშნული გამოძიება მოქალაქე ნაზო კურტანიძის საქმის საფუძველზე დაიწყო. აღნიშნულ პირს ამჟამად საცხოვრებელი ბინიდან გამოსახლება ემუქრება. საქმის მასალების მიხედვით, 2010 წლის 17 სექტემბერს, კურტანიძემ ოჯახური პრობლემების (მეუღლის მძიმე ავადმყოფობის) გამო, ჯებისაშვილისგან ისესხა თანხა, თუმცა რეალური იპოთეკის ნაცვლად, გაფორმდა ნასყიდობის ხელშეკრულება.
მიუხედავად იმისა, რომ ქონება ფორმალურად ჯებისაშვილის სახელზე გადავიდა, კურტანიძე წლების განმავლობაში აგრძელებდა სესხის პროცენტის გადახდას, რაც დასტურდება მოწმეთა ჩვენებებითა და ვიდეომასალით. დაზარალებული მხარის განცხადებით, ჯებისაშვილი მანიპულირებისა და ფსიქოლოგიური ზეწოლის გზით ცდილობდა ქონების საბოლოო მითვისებას და უარს ამბობდა სესხის საბანკო ჩანაცვლებაზე.
ამ დროისთვის საქმეში რამდენიმე საკვანძო კითხვა რჩება, რომელზეც გამოძიებამ პასუხი უნდა გასცეს:
- რატომ გაფორმდა ნასყიდობის ხელშეკრულება მაშინ, როდესაც რეალურად გაიცა სესხი?
- თუ გარიგება ნასყიდობა იყო, რატომ იღებდა ჯებისაშვილი წლების განმავლობაში პროცენტებს კურტანიძისგან?
- რატომ ითხოვდა ჯებისაშვილი საჯარო გამოსვლებში თანხის დაბრუნებას, თუ ბინა უკვე კანონიერად მის საკუთრებად ითვლებოდა?
Author
გაქვთ რაიმე მოსაზრება?
გაგვიზიარეთ თქვენი რეაქცია ან დატოვეთ მოკლე პასუხი — სიამოვნებით მოვისმენთ თქვენს აზრს!
-
0
-
0
-
0
-
0
-
0
-
0