საქართველოს ადვოკატთა ასოციაციასა და „დინამო თბილისს“ შორის ურთიერთთანამშრომლობის მემორანდუმი გაფორმდა

საქართველოს ადვოკატთა ასოციაციასა და საფეხბურთო კლუბ „დინამო თბილისს“ შორის ურთიერთთანამშრომლობის მემორანდუმი ოფიციალურად გაფორმდა . აღნიშნულ შეთანხმებას ხელი მოაწერეს ადვოკატთა ასოციაციის თავმჯდომარემ, ირაკლი ყანდაშვილმა და „დინამო თბილისის“ გენერალურმა დირექტორმა, ზაზა დოლიძემ.

წარმოდგენილი მემორანდუმი მიზნად ისახავს ორგანიზაციებს შორის ინსტიტუციური კავშირების გაძლიერებას და ასოციაციის წევრებისთვის სპეციალური, პრივილეგირებულ პირობების უზრუნველყოფას.

გაფორმებული ხელშეკრულების თანახმად, ადვოკატთა ასოციაციის მოქმედი წევრებისთვის დაწესდა გარკვეული შეღავათები, რომლებიც მოიცავს შემდეგ მიმართულებებს:

სეზონური აბონიმენტები და პროდუქცია: 10%-იანი ფასდაკლება საფეხბურთო კლუბ „დინამო თბილისის“ საშინაო მატჩების სეზონური აბონიმენტების შეძენაზე, აგრეთვე ოფიციალურ საკლუბო მაღაზიაში წარმოდგენილ პროდუქციაზე.
საფეხბურთო სკოლის სწავლის საფასური: „დინამო თბილისის“ ბაზაზე არსებულ საფეხბურთო სკოლებში სწავლის ღირებულების დიფერენცირებული დეკლარირება ადვოკატთა შვილებისთვის:
- პირველი ბავშვის შემთხვევაში — 10%-იანი ფასდაკლება;
- მეორე ბავშვის შემთხვევაში — 15%-იანი ფასდაკლება;
- მესამე ბავშვის შემთხვევაში — 20%-იანი ფასდაკლება.

ინსტიტუციური თანამშრომლობის მიზნობრივ ასპექტებზე საუბრისას, ადვოკატთა ასოციაციის თავმჯდომარემ, ირაკლი ყანდაშვილმა ხაზი გაუსვა სოციალური პასუხისმგებლობისა და ჯანსაღი ინიციატივების მხარდაჭერის აუცილებლობას:

„საქართველოს ადვოკატთა ასოციაცია განსაკუთრებულ მნიშვნელობას ანიჭებს ჯანსაღი ცხოვრების წესის დამკვიდრებას, სპორტის პოპულარიზაციასა და ახალგაზრდებში სპორტული აქტივობების ხელშეწყობას. სწორედ ამ მიზანს ემსახურება მსგავსი თანამშრომლობებიც, რომლებიც ასოციაციის წევრებსა და მათ ოჯახებს დამატებით შესაძლებლობებს სთავაზობს.“

აღნიშნული სპეციალური პირობები სამართლებრივად უკვე ამოქმედებულია. მემორანდუმით გათვალისწინებული შეღავათებით სარგებლობისათვის, საქართველოს ადვოკატთა ასოციაციის წევრებმა უნდა წარადგინონ სტატუსის დამადასტურებელი დოკუმენტი — ადვოკატის მოქმედი მოწმობა.

წყარო: საქართველოს ადვოკატთა ასოციაცია