გიორგი გვარაკიძე და ირაკლი ყანდაშვილი ინსტიტუციური თანამშრომლობის გაღრმავებაზე შეთანხმდნენ

საქართველოს პროკურატურაში გენერალურ პროკურორსა და ადვოკატთა ასოციაციის თავმჯდომარეს შორის გაცნობითი ხასიათის შეხვედრა გაიმართა.

საქართველოს გენერალური პროკურორი, გიორგი გვარაკიძე, ადვოკატთა ასოციაციის ახლადარჩეულ თავმჯდომარეს, ირაკლი ყანდაშვილს შეხვდა. შეხვედრის დასაწყისში გენერალურმა პროკურორმა ირაკლი ყანდაშვილს საპასუხისმგებლო პოზიციაზე არჩევა მიულოცა და სამომავლო საქმიანობაში წარმატებები უსურვა.

შეხვედრისას მხარეებმა დეტალურად განიხილეს მართლმსაჯულების სისტემაში ადვოკატის ინსტიტუტის ფუნდამენტური როლი.

ხაზი გაესვა იმ გარემოებას, რომ ხარისხიანი, ეფექტიანი და სამართლიანი მართლმსაჯულების უზრუნველყოფა პირდაპირკავშირშია ადვოკატის პროფესიის სიძლიერესა და დამოუკიდებლობასთან.

საუბარი ასევე შეეხო ორ უწყებას შორის ინსტიტუციური თანამშრომლობის გაფართოებას, რაც მოიცავს:

• კვალიფიკაციის ამაღლება: ერთობლივი საგანმანათლებლო პროექტებისა და ტრენინგების ორგანიზება;

• გამოცდილების გაზიარება: პროკურორებსა და ადვოკატებს შორის პროფესიული პრაქტიკის მიმოცვლის მექანიზმების დანერგვა;

• სტანდარტების განვითარება: მართლმსაჯულების პროცესში პროფესიული ეთიკისა და მაღალი სტანდარტების დამკვიდრების ხელშეწყობა.

„მხარეები შეთანხმდნენ აქტიურ და კონსტრუქციულ კომუნიკაციაზე, რაც საფუძვლად დაედება მართლმსაჯულების სისტემის შემდგომ გაძლიერებასა და სამართლებრივი სახელმწიფოს პრინციპების განმტკიცებას.“

შეხვედრის დასასრულს, გიორგი გვარაკიძემ და ირაკლი ყანდაშვილმა კიდევ ერთხელ დაადასტურეს მზაობა მჭიდრო პარტნიორობისთვის, რომელიც მიმართული იქნება ქვეყანაში პროფესიული სტანდარტების ამაღლებისა და სამართალწარმოების ხარისხის გაუმჯობესებისკენ.